Davao City – Gikapungot sa tag-iya nga si Ronie Alburo ang pagkamatay sa iyahang iro ug iring kinsa ilahang gisuspetsahang gipanghiloan sa ilahang compound sa may Mandug ning syudad.
Sa interbyu sa RMN Davao kang Alburo nga nabalaka na sila sa sunod-sunod nga pagkamatay sa mga hayop sa ilahang lugar.
Matud ni Alburo nga niadtong nakalabayng bulan giingong gihiloan usab ang mga iro sa ilahang mga silingan sa wala pa mailang suspek.
“Among iro pang lima na ni nga gihiloan pati among mga iring nahurot na pod og hilo. Among katapad og atbang nga balay puro pod gipang hiloan ilang mga alaga,” matud niini.
Sa gipadangat niining sumbong ngadto sa among team nga ginalabay matud pa mismo sa sulod sa balay pagkagabie ang pagkaon nga adunay giingong hilo.
“Naa miy nakita last month pod to nga nukos nga dili luto pero naay mga gipangsok-sok sa sulod,” gisugilon niini.
Gisaysay niini nga aduna siya’y namatikdang suspisyusong tao nga gabahis-bahis sa kadlawong dako duol sa ilang balay ug dali ra pod kining nisibat human nga iyaha kining nabantayan.
Gikondena ni Animal Rescue Rehabilitation & Fostering ARRF – Davao, Inc. Founder ug Senior Animal Welfare advocate Marites Batacan ang giingong pagpatay sa maong mga hayop ug tataw kini nga paglapas sa Animal Welfare Act.
Gidasig ni Batacan ang mga tag-iya nga ipatala ang maong insidente sa ilahang barangay o sa Animal Welfare Desk sa pinakaduol nga istasyon sa pulis sa maong lugar aron maaksyunan kini.
Samtang, gibutyag ni Davao City Police Office head P/Sr. Supt. Alexander Tagum nga ilaha kining imbestigahan.
Matud pa niini nga posibleng modus kini sa mga kawatan.
RadyoMaN Aimee Guinita
