San Pablo, Zamboanga del Sur – NA-ALARMA ang mga lumulupyo sa lungsod sa San Pablo ang pag-atake sa mga grupo sa mga iro nga misup-sup sa dugo ug mihab-hab sa sulod sa ginhawaan sa mga kahayopan.
Sa taho nga nahipos sa RMN DXPR Pagadian mokabat na sa dul-an 50 ka kanding ug baka ang gipapa sa gitoohang mga iro nga maisugong niatake sa pipila ka Barangay sa San Pablo sama sa Brgy. Lumbayao, Condom, Payag, Sakbulan, Sungoy, Lower Pantad ug Kalilangan.
Subay sa nahimong pamahayag sa mga nanag-iya og kahayopan ni-atake matud pa ang mga iro bisan panahon sa adlawan.
Sa interview sa RMN Pagadian kang Renante Tactacon upat ka binuhing kanding gipatay sa moang mga mananap.
” Natingala ko nga patay na ang akong upat ka kanding , gikuhaan og ginhawaan ug gisuyop ang dugo” pamahayag ni Renante.
Nabalaka na ang mga residente sa lugar kay basin kun dili lang hayop ang target sa iro kundili mohab-hab usab kini og tawo.
Nagpabiling misteryo ug tanghaga alang kanila ang hitabo ug uban nagtoo nga ungo ang niatake sa ilang lugar apan nagtakuban lang sa dagway sa iro.
Atangi ang dugang kasayuran ugmang adlawa sa programang straight to the Point alas 6:30 ngadto sa alas 8:00 sa buntag.
