Davao City – Han-ay na ang seguridad nga ipatuman sa mga awtoridad alang sa pag-arangkada sa Alveo Ironman 70.3 triathlon race karong Marso 24, adlaw’ng Domingo dinhi sa syudad sa Davao.
Sumala ni Davao City Police Office (DCPO) spokesperson PSI Ma. Teresita Gaspan nga karon pa lang aduna na silay soft deployment sa three layered security alang sa ikaduhang pagpahigayon sa maong aktibidad dinhi sa dakbayan.
Saysay ni Gaspan nga adunay 1,700 ka mga indibidwal ang mupartisipar sama sa professional athletes sa nasud ingon man langyaw, celebrities ug ang pure race enthusiasts apan nagpahinumdom nga kinahanglan gihapon sundon ang mga gipatumang ordinansa ug balaud.
Dugang ni Gaspan nga walo ka mga hotels duol sa Azuela Cove, ang mismong event place, ang ilang bantayan sanglit kini mao ang mamahimong sagad billeting areas sa mga atleta gani 60 ka mga tourist police ang ideploy sa maong lugar.
Anaa sa 3, 200 ka mga personahe ang ideploy karong adlawng Domingo gikan PNP, AFP, TFD, Naval Forces lakip na ang augmentation forces sanglit usa kini ka integrated security operation.
Kasamtangan nagapadayon ang coordination meeting sa mga organizers ug awtoridad alang sa pagpaniguro nga luwas ug malampuson ang maong aktibidad.
Gi-awhag usab ni sa tigpamaba sa DCPO nga makig koordinar o i-report gilayon ngadto kanila kung adunay mamatikdang kadudahang lihok.
RadyoMan Jason Amisola
