‘Irresponsible parents’ angay silotan

29

Davao City – Hugot nga giuyonan karon ni Lasang Barangay Captain Allan Simo-ag ang istratehiyang gi-adaptar ni Manila Mayor Isko Moreno nga ginikanan mismo ang direktang silotan sa kalapasan sa ilang mga anak diha sa curfew ug mandatory health standards.

Matud ni Simo-ag, angayan lamang nga patubagon sa balaud ang mga ginikanan kinsa mapasagaron diha sa responsibilidad pagbantay sa ilang mga anak hinungdang nakahimo sa kalapasan ang naulahi panahon sa pandemic sama sa regulasyon sa curfew hour ug strict health protocols.


Dugang ni Simo-ag nga dugay na ang nasangpit nga regulasyon apan karon lamang subling natagad ug nahatagan og igong gibug-aton tungod sa COVID-19.

Usa ka ginikanan lamang ang angay masampulan sa balaud aron ang mabagang duot sa katawhan makakat-on usab sa pagpangisog og pagpamadlong ngadto sa ilang kaugalingong mga anak kinsa nagalatagaw panahon sa kadlawon.

Nagtoo karon si Simo-ag nga daghan ang wala makatuhog sa hustong punto sa gobyerno kun nganong kinahanglanon kaayo sa publiko ang pagsuot og face mask ug physical or social distancing kon anaa taliwala sa panagtapok sa pamilya ug sa mga higala aron ang virus mapunggan sa pagkuyanap.

RadyoMaN Joel Viray

Facebook Comments