Patay ang isa ka lalaki samtang ginabulong sa ospital matapos nga ini ang ginluthang sa San Jose , Antique kaina sang hapon (Hulyo 27).
Ginkilala ang biktima nga si Bonnie Sanchez, legal ang pang-edaron kag pumuluyo sang Hamtic, Antique.
Base sa pagpangusisa sang San Jose PNP, natabu ang insidente alas 5:30 kaina sang hapon sa National Highway sang Barangay Maybato North, San Jose, Antique samtang nagasakay sa iya motorsiklo ang biktima papuli sang ini ang ginsundan sang suspek nga nagasakay man sa motorsiklo.
Samtang nagadalagan ang motorsiklo, ginluthang sang wala makilala nga suspek si sanchez nga nakaagum sang indi magnubo sa anum ka mga igo sang bala sa nagkalain-lain nga parte sang iya lawas.
Gindala pa sa Angel Salazar General Hospital ang biktima apang ini ang napatay samtang ginabulong.
Padayon pa nga gina-imbestigahan sang kapulisan kon ano ang motibo sa pagpatay sa biktima.
Nahibaluan nga si Sanchez ang nagpadalagan sa pagka-SB member sang Hamtic, Antique sang nakaligad nga eleksyon apang wala magdaug.
