Maayon, Capiz- Pilason ang isa ka persona matapos maluthangan sang mismo mga pakaisa sini pasado alas sais sang gab-e sa Brgy Maalan banwa sang Maayon.
Ginkilala ang biktima kay Randy Rupera y Dorado alyas Nonoy Berdugo, 39-anyos nga sa subong ang ginabulong sa Bailan District Hospital.
Suno sa imbestigasyon sang kapulisan, magkaupod nga nag-inum sa birthday party ang biktima kag mga pakaisa nga sanday Joemil Rupera y Fuentes, 20- anyos kag Daniel Rupera alyas Padoy 28- anyos sang nagluntad ang komosyon sa tunga sang mga ini.
Una nga naggabot sang kutsilyo ang biktima kag ginpanghangkat sang away ang mga bisita lakip ang mga suspek apang ang mga ini ang natambagan.
Ginkakibot na gid lamang sang tanan sang nakabati sang lupok sang pusil matapos nga ginsunod sang mag-utod ang amu nga biktima nga magapauli na kag ginluthang gamit ang 12- gauge shot gun.
(c)- web photo
