Isa ang patay kag duha ang pilason matapos nagbunggu-anay ang duha ka motorsiklo kag bisilekta sa Barangay Malayu-an, Ajuy, Iloilo kahapon sang aga (Marso 31).
Ginkilala ang driver sang motorsiklo nga napatay nga Ismael Barbas, 50-anyos sang barangay San Antonio, Ajuy, Iloilo.
Samtang ang driver sang isa pa ka motorsiklo nga pilason ginkilala kay Ritchie Engalgado, 27 anyos kag ang driver sang biseklita nga napilasan man amo si Valentine Elanga, 44 anyos.
Base sa imbestigasyon sang Ajuy PNP, ginpahayag ni Staff Sergeant Randy Flores, imbestigador sang Ajuy Police Station, nabungguan ni Barbas si Engalgado nga nagaserbe bilang guide sa nagapalumba sang bisikleta.
Subong man, nadalasa naman si Elanga nga nagapasakop sa kompetisyon.
Gilayon nga gindala sa ospital si Barbas apang gindeklarar nga dead on arrival samtang sanday Engalgado kag Elanga ang padayon naman nga ginabulong sa Western Visayas Medical Center.
