Isa patay, isa pilason sa aksidente sa Brgy. Villamonte

BARANGAY VILLAMONTE, Bacolod City – Patay ang angkas samtang pilason ang driver sang motorsiklo sa aksidente nga nagluntad sa dalan Circumferencial, Purok Herbabuena, Barangay Villamonte, Bacolod City kagab-i, Mayo 8.

Suno sa imbestigasyon ni SPO2 June Garong, Traffic Investigator sang Police Station 4, padulong sur nga bahin ang duha ka mga biktima sang naglapaw sa gutter ang ila ginasakyan nga motorsiklo kag nabungguan ang isa ka water dispenser sa atubang sang isa ka kalan-an kag nakasalapay man sang isa ka asalan.

Ginkilala ang driver sang motorsiklo nga si John Charlie Sanchez, 25 anyos, pumuluyo sang Barangay Blumentritt, Murcia. Nag-angkon ini siya sang pilas sa lawas.


Patay naman ang angkas sini nga si Mark John Lagajeño, 27 anyos, pumuluyo sang Poblacion 1, Himamaylan City.

Padayon karon ang imbestigasyon sang otoridad samtang yara naman sa kustodiya sang station 4 ang motorsiklo sang mga biktima. /IFM NEWSROOM/RCSG

Facebook Comments