CAUAYAN CITY – KINUMPIRMA NG NUEVA VIZCAYA POLICE PROVINCIAL OFFICE NA NAGPOSITIBO SA IPINAGBABAWAL NA DROGA ANG ISA SA LIMANG EMPLEYADO NG LAND TRANSPORTATION OFFICE (LTO) REGION 2 NA NAARESTO SA IKINASANG ENTRAPMENT OPERATION NITONG LUNES NG GABI, SETYEMBRE 1, SA BAYAN NG BAMBANG, NUEVA VIZCAYA.
MATATANDAANG NADAKIP ANG LIMANG SUSPEK MATAPOS IREKLAMO NG UMANO’Y PANGINGIKIL SA MGA MOTORISTA. SA ISINAGAWANG SEARCH OPERATION NG BAMBANG POLICE, NAREKOBER ANG ₱40,000 MARKED MONEY, TATLONG BARIL, IBA’T IBANG DRIVER’S LICENSE, ISANG SACHET NG HINIHINALANG SHABU, DALAWANG LIGHTER AT DRUG PARAPHERNALIA.
AYON KAY POLICE COLONEL PAUL BOMETIVO, PROVINCIAL DIRECTOR NG NUEVA VIZCAYA POLICE PROVINCIAL OFFICE, LUMABAS SA ISINAGAWANG DRUG TEST NA NAGPOSITIBO ANG ISA SA MGA NADAKIP NA LTO ENFORCER. DAGDAG PA NIYA, MAY MGA DOKUMENTO PARA SA TATLONG BARIL NA NAKUHA, NGUNIT PERSONAL NA PAG-AARI UMANO ANG MGA ITO AT HINDI OPISYAL NA GAMIT NG LTO.
SINAMPAHAN NG MGA KASONG PAGLABAG SA ANTI-GRAFT AND CORRUPT PRACTICES ACT, CODE OF CONDUCT AND ETHICAL STANDARDS FOR PUBLIC OFFICIALS AND EMPLOYEES, AT KARAGDAGANG KASO SA ILALIM NG RA 9165 (COMPREHENSIVE DANGEROUS DRUGS ACT) PARTIKULAR SA SECTION 11 AT 12 ANG SUSPEK NA NAGPOSITIBO SA DROGA. INIHARAP NA RIN ANG MGA AKUSADO SA PISKALYA NITONG SETYEMBRE 3.
KINUMPIRMA RIN NI POLICE MAJOR RANDY VELARDE, HEPE NG BAMBANG POLICE, NA POSITIBO SA SHABU ANG NAKUHANG SACHET, AT NATAGPUAN DIN ANG SHABU RESIDUE SA TUBE PIPES NA NAREKOBER MULA SA BAG NG ISA SA MGA SUSPEK, BASE SA PAGSUSURI NG PNP FORENSIC UNIT SA SANTIAGO CITY.
NILINAW NAMAN NI PCOL. BOMETIVO NA WALANG MAGIGING ALITAN SA PAGITAN NG LTO AT PNP KAUGNAY SA OPERASYON DAHIL ITO UMANO AY BAHAGI NG TRABAHO LABAN SA GRAFT AND CORRUPTION.
NAKATALAGA ANG MGA SUSPEK SA REGIONAL OFFICE NG LTO SA TUGUEGARAO CITY AT HINDI RESIDENTE NG NUEVA VIZCAYA. NASA ILALIM SILA NGAYON NG KUSTODIYA NG PULISYA HABANG HINIHINTAY ANG RESOLUSYON NG KANILANG MGA KASO.
