Bago City, Negros Occidental – Padayon ang manhunt operation sang mga kapulisan kag mga Jail Guards batuk sa nabilin nalang nga isa ka inmate nga nagpalagyo sa Negros Occidental District Jail sa Barangay Tabunan, Bago City.
Nabilin nalang nga at large amu si Vercilito Capulong, 27 anyos nga tumandok sang Kidapawan, North Cotabato kag temporaryo nga naga-istar sa La Carlota City.
Suno kay Jail Insp. Ruth Estales, Jail Warden sang Negros Occidental District Jail, nagpatigayon sang head count, kagapon sang aga apang natalupangdan nga wala na ang duha ka mga priso nga sanday Ramon Ventura kag Capulong.
Si Ventura ang may kaso nga carnapping sa Regional Trial Court Branch 53 sa syudad sang Bacolod samtang si Capulong ang may kaso nga paglapas sa Article 179 sang Revised Penal Code.
Mga las 8:30 kaina sang aga, nagsurender si Ventura sa manhunt team paagi sa iya nga tiyo nga si Joseph Padronia sa Brgy. Buenavista, Murcia.
Sa imbestigasyon, nasiplatan man si Capulong sa amu nga lugar sakay sa isa ka itom nga motorsiklo.
Nagapanawagan naman si Jail Cinsp. Ruth Estales sa mga himata sang priso nga itugyan nalang ini sa mga otoridad para indi na madugangan ang iya nga kaso.
Ang duha ang nakapalagyo paagi naman sa pagtaklas sa pader sang amu nga bilangguan.
Estales, BJMP,
