Isa sa mga suspek nga nakigpinusilay sa mga Pulis sa Libertad Misamis Oriental, nasikop sa nagpadayun nga pursuit operation sa kapulisan

Nasikop pasado alas-4:00 kagahapon sa hapon ang usa sa tulo ka mga suspek nga naka-ikyas samtang nakigpinusilay sa mga pulis niadtong Lunes sa gabi sa Libertad, Misamis Oriental.

Matud pa Lieutenant Colonel (LtCol) Mardy Hortillosa, tigpamaba sa Police Regional Office 10, nadakpan kini sa may Sitio Liporan, nga sakop sa Barangay Poblacion sa Libertad, sa nagpadayun nga pursuit operation sa mga pulis.

Wala pa ginganlan ni Hortillosa ang suspek nga nakigpinusilay sa nag-checkpoint nga mga pulis sa Libertad nga gikamatay ni Police Staff Sergeant Ronald Caayupan ug samaran ang isa pa ka pulis nga si Chief Master Sergeant Fernando Maestrado.


Una nang napatay ang kauban niining driver nga nailang si Jephone Fabriga Tinamisan ug nasikop niadtong Martes sa buntag ang kauban nga nagpaila sa mga pulis nga si Richard Son Perez apan Richard Manda ang pa-ila sa media.

Miingon si Captain Dino Magno, hepe sa Initao Municipal Police Station kinsa kuyog sa pursuit operation, nakuha nila ang suspek kagahapon, kapin kun kulang lima ka kilometro ang gilay-on gikan sa lugar kung asa unang naka-engkwentro sa grupo niini ang mga pulis nga nag-checkpoint.

Wala kini gunshot wound o samad-pinusilan apan daghang pangos sa lawas nga posibleng nakuha tungod sa pag-ambak sa tulay nga wala nay tubig.

Hugaw og lawas ug gutom ang suspek kinsa nagtago sa mga kasagbutan nga unang nakit-an sa mga residente sa dapit nga gilayong na-report ngadto sa pulis. 

Anaa na kini karon sa kustodiya sa Libertad police alang sa interogasyon ug dugang imbestigasyon. (Divina M. Suson, February 20)

Facebook Comments