Manila, Philippines – Viral ngayon sa internet ang video ng isang diver na ginawang toothbrush ang mga isda sa Egypt.
Sa isang video, makikita ang russian diver na si Vitaly Bazarov na nasa ilalim ng 100 talampakang tubig at ang dalawang cleaner fish na lumapit sa kanyang mukha.
Kinakagat-kagat ng mga ito ang kanyang labi pero sa halip na paalisin ay tinanggal ni Bazarov ang kaniyang regulator mula sa kanyang bibig.
Ibinuka pa niya ang kanyang bibig para makapasok ang mga cleaner fish na naghahanap ng pagkain.
Hinayaan lang ni Bazarov ang mga isda dahil para aniya itong mga buhay na toothbrush.
Nabubuhay ang mga cleaner fish sa pamamagitan ng paglilinis sa bibig ng ibang isda katulad ng mga pating at pagi.
Nililinisan din nila ang katawan ng iba pang klase ng mga hayop katulad ng mga pagong at pugita.
Nakakatulong ang mga cleaner fish sa kalusugan ng ibang hayop dahil kinakain nila ang mga parasite na nakatira sa katawan o sa bibig ng ibang lamang-dagat.
DZXL558
