Davao City – Gibanabanaan nga muabot sa 150 ka balay ang nasunog nga miulbo pasado alas-11:00 Biyernes sa buntag nahitabo sa Purok 3 Isla Verde, Brgy. 23-C siyudad sa Davao.
Sa interbiyu sa RMN Davao kang Fire Inspector Esequil Tabon sa Bureau of Fire Protection 11 nga nagsugod ang sunog sa kuwarto sa panimalay ni Layla ug King sa ikaduhang andana nga bahin.
Matud ni Tabon nga kusog ang hangin hinungdan nga papas mikanit ang kalayo resulta sa pagkasunog sa mga kasikbit nga mga balay.
Giingon ni Tabon nga ila pang gina-imbestigahan kung unsay hinungdan sa sunog ug subay sa initial nga impormasyon nga ilang nakuha nga dunay nagluto niadtong tungora apan ila pang ginaberipika.
Ala-1:37 sa hapon gideklarang fire out ang sunog nga niabot sa 3rd alarm.
Sumala ni Tabon nga dili pa nila ma-establisar kung pila ang kantidad sa damyos ingon man kun pila ka pamilya ang apektado tungod kay padayon pa nga gina validate sa taga-CSSDO.
Hinuon walay casualty o nasamdam atol sa maong insidente.
RadyoMaN Don Pulayao
