Davao City – Daan nang gikonsiderang posibleng mahitabo ang pagpamomba sa Isulan, Sultan Kudarat kagabii nga gikamatay sa duha ka tao ug pagkaangol sa kapin 30 ka mga indibwal lakip ang duha ka sundalo.
Sumala ni Regional Mobile Force Battalion 11 (RMFB XI) Commander PSupt. Maximo Sebastian Jr. atol AFP-PNP presscon, subay kini sa nahitabong pagkapatay sa second-in-command sa Maute group sa General Santos City ug ang asawa sa lider sa maong grupo nga si Abu Dhar.
Human madawat ang maong impormasyon gilayon nagpatuman og mas hugot nga checkpoints sa tibuok Rehiyon 11 sulod sa bente kwatro oras ang ilang grupo.
Subay niini, gisugilon ni 10th ID spokesperson Captain Jerry Lamosao nga nakigkoodinar na ang 10th Infantry Division Philippine Army sa Task Force Davao alang sa seguridad sa katawhan ilawom sa ilang area of responsibility kun AOR ilabi na sa mga ginalusad nga checkpoints aron masegurong dili makalusot ang mga terorista
Samtang gibutyag usab ni Police Regional Office kun PRO XI spokesperson Police Chief Inspector Milgrace Driz, andam kanunay ang otoridad ugaling adunay mahitabong spillover dinhi sa mga hinimuan nga terorista sa mga kanait nga lugar sa rehiyon.
Dugang sa tigpamaba nga adunay mga reports matag karon ug unya nga madawat bahin sa pagpanghulga sa seguridad ug giseguro niini nga padayon ang ilang koordinasyon sa uban pang security forces ug law enforcement agencies sa pagpugong sa mga di maayong hinimuan sa mga terorista.
RadyoMaN Jason Amisola / RadyoMaN Renz Barbarona
