Cauayan City – Binawian ng buhay ang isang lalaki matapos sumalpok ang sinasakyang Isuzu Traviz sa isang garbage truck pasado alas dos ng madaling araw kahapon, ika-10 ng Nobyembre, sa Brgy.
District 1, Cauayan City, Isabela.
Ang nasawi ay ang pasahero ng Isuzu Travis na kinilalang si Mark Edison Magbanua, 33-anyos, helper, mula sa Sta. Maria Bulacan.
Sa nakuhang impormasyon ng IFM News Team sa Cauayan City Police Station, binabaybay ng garbage truck na minamaneho ni Rocar Dela Cruz, 38 anyos, at ng Isuzu Traviz na minamaneho naman ni Erwin Divera, 41-anyos ang parehong direksyon kung saan nasa unahan ang garbage truck.
Nang makarating sa pinangyarihan ng insidente, huminto sa gilid ng daan ang garbage truck upang magkarga ng basura nang bigla na lamang salpukin ng rumaragasang Isuzu Traviz ang kaliwang bahagi ng garbage truck.
Dahil sa lakas ng pagkakasalpok, wasak ang harapang bahagi ng Isuzu Traviz at nagtamo ng malalang sugat sa iba’t-ibang bahagi ng kanilang katawan sina Divera at Magbanua na naging dahilan ng pagkasawi ni Magbanua.
Sa kasalukuyan, nasa kustodiya na ng Cauayan City PS ang driver ng Garbage truck para sa karagdagang imbestigasyon, habang nasa pagamutan naman ang driver ng Isuzu Traviz.
