Davao City – Gumikan sa kadaghang palpak nga nahimo ni Department of Health Secretary Francisco Tiongson Duque III ilabi na diha sa health crisis mugna sa coronavirus disease kon COVID-19, wala nay igong rason pa aron magpabilin pa kini sa iyang katungdanan.
Sa interview sa programang ‘Straight to the Point,’ gibutyag karon ni Salaysay, Marilog District Barangay Captain Robert Itdang nga wala na’y luna pa si Duque sa gabinete ni Pres. Rodrigo Duterte tungod sa nagkatipun-ok nga mga nahimong aberiya diha sa atong nasudnong krusada pagkumbate sa COVID-19.
Matud ni Itdang, mas maayong boluntaryong mobiya sa katungdanan ang kalihim inay nga hulaton pa niyang pogoso siyang sipaon mismo sa pwesto sa hefe-ehekutibo.
Kagahapon, mismong si Sen. Panfilo Lacson nangatarongan nga daw adunay ‘anting-anting’ kun amulet si Duque rason nga dili kini matandog sa iyang lingkuranan taliwala sa daghang mga isyu kontra sa iyang pamunuan.
Usab dugang ni Itdang nga makatabang diha sa public trust and confidence restoration sa gyera batok ning maong virus kun hatagan ni Duque og ‘free hand’ kun kagawasan ang pamuno-nasud nga makapamili ug mas epektibong tigdumala sa DOH ning kritikal kaayo nga estado sa atong panggobyerno.
RadyoMaN Joel Viray
