Jail officer gintiro patay

50

Patay ang isa ka jail officer samtang pilason naman ang isa pa matapos nga ini sila ang gin-ambush sang wala pa makilala nga mga suspek las 11:50 kagab-i sa Purok Katipunan, Brgy. Cabug, Bacolod City.

Ang biktima nakilala kay JO1 Jayvee Jason Vargas, 28 anyos samtang napilasan naman sa iya likod si Gian Philip Yulo, 25 anyos tanan sang Brgy. Handumanan, Bacolod City.


Sa imbestigasyon sang Police Station 9 ginpahayag nga ang mga biktima ang nagasakay sa isa ka salakyan nga gina-maneho ni Vargas upod ang tatlo ka iban pa nga amo sanday retired SJO2 Joevy Vargas, amay sang biktima, Femmy Taño kag Philip Jurgen Yulo.

Base sa imbestigasyon samtang nagadalagan ang salakyan sa area sang CEGASCO Road, may nag overtake nga duha ka motorsiklo kag hinali na lamang sila nga ginpaarakan sang luthang, samtang may isa pa gid ka Innova nga nagasunod kon diin nagpanaug ang armado nga sakay sini.

Nag-angkon sang pilas sa iya ulo si Vargas kag sa iban pa nga bahin sang iya lawas nga amo naman ang gintunaan sang iya gilayon nga kamatayon.

Bangud sini nag-derecho kag gindusdos sang salakyan ang isa ka balay nga ginapanag-iyahan naman ni Hermenio Espital.

Madumduman nga sadtong Abril tuig 2019, si Vargas ang gintiro man sang riding in tandem sa gwa sang BREDCO Port samtang sakay sang Strada pick-up nga sa amo nga tion gina-maneho sang iya manghod nga babayi kon diin nag-angkon gid lamang ini sang pilas sa iya butkon.

Kahilabtanan sang amay sang biktima sa illegal drugs amo karon ang ginalantaw nga motibo sang mga otoridad sa amo nga krimen.

Facebook Comments

From Advertisers