Davao City – Nasakoti sa Philippine Drug Enforcement Agency 11 ang usa ka Japanese National nga nagpayuhot og iligal nga droga sa Davao del Sur atol sa gikasa nga buy-bust operation sa lungsod sa Malalag Davao Del Sur 6:30 sa kagabhion.
Gikunsidara nga high value target ug anaa sa PDEA 11 drug watchlist ang langyaw nga si Paul Nakagawa nga nag-operate sa Davao Occidental ug Sarangani Province uban sa usa ka alyas Bogie.
Suma ni PDEA 11 Director Tony Rivera nga gipusasan ang suspek human gitunol ang iligal nga droga sa agent atol sa buy-bust operation nga gipahigayon sa usa ka restaurant sa Sitio Baluyan, Barangay Bolton sa mao nga lungsod.
Nakumpiskahan pa ang suspek og kapin 800 ka gramos sa shabu nga dunay kinatibuk-ang kantidad nga dul-an usa ka gatos ka libo ka pesos.
Pikas bahin, sikop usab ang usa ka empleyado sa kagamhanang probinsiya sa Davao Oriental sa gilusad nga buy-bust operation sa PDEA 11 sa Barangay Central, Mati City, Davao Oriental 1:00 gahapong adlawa.
Ang suspek nga si Erlanie Cani Jr.22 anyos, ulitawo, provincial employee nagpuyo sa Batman Village, Barangay Dahican sa mao nga syudad.
Gibaligyaan matud pa sa suspek ang usa ka agent sa PDEA mao nga gidakop kini diin nakuha pa gikan kaniya ang laing usa ka gramo nga shabu nga dunay value market nga 12 ka pesos, 500 pesos mark money ug motor nga gigamit sa iligal nga operasyon sa drug pusher.
Lakip sab nadakpan ang kauban ni Cani nga si Dave Guinita.
Ang tulo mag-atubang og kasong may kalapasan sa Section 5, 11 sa Article 2.
RadyoMaN Joel Viray
