Davao City – Subling gibatikos karon sa Southeastern Mindanao Diversified Drivers & Operators Cooperative (SEMDDOC) ang gobyerno tungod sa pursigidong lakang niini nga i-phase out ang tanang mga Public Utility Jeepneys (PUJs) diha sa kadalanan sa entero nasud.
Gipuna ni SEMDOCC President Manuel Duran ang kagamhanan gumikan sa wala pagkunsidera sa dakung epekto ngadto sa panginabuhian sa tanang mga drivers ug sa kalisud nga masugata sa ilang mga pamilya sa dihang hingpit na nga wagtangon ang mga PUJ ug hulipan sa modernong bus units.
Gikaputong ni Duran ang aksiyon sa kagamhanan kay imbes mutabang, giwad-an na man hinoon og pangita ang mga drivers ug giduot pa gayod sa kalisdanan ang ilang mga pamilya.
Mipalag ang maong transport group ngadto sa kagamhanan tungod kay gipugos ang mga driver ug mga operator nga pakuhaon og bag-ong bus units aron ihulip sa ilang mga karaang PUJ units nga taudtaud na kaayong gabiyahean sa kadalanan.
Hinoon gipasalig ni Duran nga magbiyahe gihapon ang ilang mga sakop luyo sa ikasa nga transport strike diin kini nagpasabot nga walay angay kabalak-an ang publiko tungod sa daghang PUJs nga masakyan karong adlawa.
RadyoMaN Joel Viray
