Davao City – Gi-insistir karon ni Presidential Anti-Corruption Commission (PACC) Chairman Dante Jimenez nga bugtong pag-usab sa kasamtangang balaud ug panggobyerno ang hingpit matapos sa suliran sa korapsyon sa Pilipinas.
Girason ni Jimenez nga hangtud dili mailisan ang balaud ug ang sistema sa kagamhanan, kawang lamang ang tanang paningkamot nga tuldokan ang kurapsyon nga nagpakabus og maayo sa nasud.
Gipasabot ni Jimenez nga seryoso ang administrasyong Duterte sa kampanya kontra korapsyon apan gumikan sa nagpatigbabaw nga sistema dili sayon ang paghuman sa pagpangawkaw sa kaban sa katawhan.
Apan positibo ang opisyal nga makalingkawas ra sa dili madugay ang mga Pilipino gikan sa korapsyon sa katapusang mga adlaw sa termino ni Pres. Duterte sa tuig 2022.
Nagtoo si Jimenez nga padayon gihapon ang kinawatay diha sa gobyerno sama sa housing project sa National Housing Authority (NHA) didto sa Zamboanga City nga tataw kaayo’ng adunay anomaliya ang proyektong substandard.
Ug gani daghan nang mga opisyales sa kagamhanan ang nataktak sa pangatungdanan ug napasakaan na og sumbong sa Ombudsman tungod sa pagpangawkaw.
Dugang pa hefe sa PACC nga lauman pa nga mas daghan pa sa mga opisyales sa gobyerno nga kakontsaba sa mga korap nga kontratista ang makiha aron mabalhug sa bilanggoan.
RadyoMaN Joel Viray
