Davao City – Dili man tanang sakop sa pamilyang Ampatuan nakumbikto sa Maguindanao Massacre case decision ni Quezon City Regional Trial Court (RTC) Branch 221 Presiding Judge Jocelyn Solis-Reyes kagahapong adlawa, paigo na kini alang kang Presidential Anti-Corruption Commission (PACC) Chairman Dante Jimenez.
Matud ni Jimenez, ang guilty verdict sa mga principal accused sa masaker nga sila Zaldy ug Andal Ampatuan, Jr. kinsa gihukmang mabilanggo sa tibuok nilang kinabuhi nagpakita nga adunay hustisya sa nasud.
Sa kapin usaka gatos ka akusado, 28 ang nahukmang guilty gipangulohan sa magsoong Zaldy ug Andal ug laing 15 kanila giilang mga accessories sa krimen kinsa gihukmang ma-preso gikan 6 ngadto sa 10 ka tuig.
Samtang sila si Datu Akmad “Tato” Ampatuan, Sr. ug Datu Sajid Islam Ampatuan acquitted sa kaso uban sa lain pang mga akusadong pulos mga pulis ug auxiliaries tungod sa huyang ang mga ebidinsiya nga gipresenta sa korte aron magduot unta kanila sa mangilngig nga masaker sa Maguindanao niadtong 2009.
Matud ni Jimenez, miabot man og napulo ka tuig ang pagdungog sa kaso una pa hingpit gi-anunsisyo ang paghukom ni Judge Reyes, ang importante sa kanhi Volunteers Against Crime Corruption (VACC) president mao nga hingpit nang naangkon ang hustisya sa mga kabanay sa mga biktima sa masaker.
Ang usaka dekadang gidugayon sa pagdungog sa kaso pagpakita lamang sa kahinay ug kadunot sa sistema sa hustisya sa nasud gumikan ra usab sa delaying tactics sagad ginahimo sa mga abogado sa kampo sa mga principal accused, dugang sa maong opisyal.
Mapasalamaton gihapon si Jimenez sa korte kay gipagawas ang hukom subay sa balaud ug mga ebidensiya nga gipresentar busa dili gihapon sayang ang pagpaabot ug pag-antos sa taas nga panahon sa mga kabanay sa mga biktima kay ila man usab nadawat ang hustisya nga ilang gipangayo.
Sa pagkumbikto sa pipila ka mga Ampatuan clan members, usa lamang ang nadayag nga kamatooran niini: Nga bisa’g unsa pa kadugay sa pagdagan sa kaso gumikan sa mga legal remedies ug tactics nga gihimo sa kampo sa mga akusado, sa kaulahian aduna gihapo’y malauman nga hustisya ang mga pamilya sa mga biktima sa masaker ug nga masaligan pa gihapon ang Philippine justice system.
RadyoMan Joel Viray
