Davao City – Kapin onse mil ka mga trabaho ang gitanyag sa duha ka adlaw nga jobs fair sugod ugmang adlawa, Mayo 1 ug Mayo 2 ning tuiga subay sa pagselebrar sa Adlaw sa Pamuo kun Labor Day.
Sa opisyal nga gipagawas nga anunsyo sa Department of Labor and Employment kun DOLE XI pinaagi sa ilang facebook fan page, adunay 11, 882 ka mga trabaho sa local ug overseas ang naghulat alang sa mga aplikante.
Ang maong jobs fair sa DOLE XI kauban ang Department of Trade and Industry (DTI) gititulohang “Trabaho, Negosyo Kabuhayan Fair nga ipahigayon sa nasangpit nga mga adlaw sa Gaisano Mall, Bajada ning syudad sa Davao.
Sagad sa mga nag-unang trabaho sa lokal mao ang mason, call center agent, panday, sales clerk/associate, service crew, marketing professional ug uban pa samtang sa overseas mao ang nurse, cleaners, sales associate, service crew , caregivers, waiter/waitress, delivery driver, engineers (mechanical, electrical, & civil) ug welder.
Sa karon, nagpadayon karong adlawa ang pre-registration sa maong aktibidad ug ang mini jobs fair schedule sa 3rd floor sa nasangpit nga mall.
RadyoMaN Renz Barbarona
