Davao City – Sa katuyuan nga ma-usa ang kasundaluhan, mga pulis, ug ang mga organisasyon nga nakabase sa syudad sa Dabaw, gitukod karon ang Joint Reserve Task Force Davao.
Gibutyag ni EASTMINCOM Spokesperson Major Ezra Balagtey nga pilot ang syudad sa Dabaw sa pagtukod og Joint Task Force Davao nga giapilan sa mao nga mga grupo tulo ka semana na nakalabay.
Gikanayon ni Balagtey, ang mga myembro sa Joint Task Force mao ang Airforce, Army, Naval, Kapulisan, Task Force Davao, mga Rescue and Emergency team ug uban pang sector sa katilingban.
Ang naasoy nga kahugpungan maoy mag-adbokasiya sa Ambassador of Peace kun magpakanat sa kalinaw sa tumong nga maaghat ang tanan sa pag-undang sa pagsabwag og gubot sa atong dapit.
Dugang sa opisyal nga gawas sa pagbitbit sa kalinaw sila usab ang magsilbi nga first responder sa bisan unsa nga kalamidad nga matigayon sa dakbayan.
Gipasabot ni Balagtey nga kung magka-usa ang tanan walay lisod nga dili mahimong sayon diha sa pagti-nabangay aron masulbad ang pagbutho sa lahi-lahi nga krisis ug suliran sa atong dapit.
Sa karon, ang dakbayan sa General Santos naka-organisa na sab og kaugalingon nga Joint Task Force Gensan.
RadyoMan Joel Viray
