Ginmandu-an sang Department of Labor and Employment ang Jollibee Foods Corporation nga himuon regular ang halos 6,500 ka mga empleyado sini.
Sa isa ka statement, nakasulat sa report ni Labor Undersecretary Joel Maglunsod, nga ginpahayag ni DOLE National Capital Region Director Henry John Halbuena nga ginmanduan niya ang JFC nga iregularize ang yara sa 6,482 ka mga Jollibee workers nga gindeploy sang duha nila ka mga contractors.
Ginmanduan man sang ahensya ang nasambit nga fast food giant nga i-refund ang iligal nga koleksyon sa 426 ka mga apektado nga mamumugon nga nagabalor sa halos PhP 15 million.
Ang nasambit nga refund ang para sa coop share, coop Christmas party, paluwagan fund kag coop savings fund nga ginakolekta sa mga Jollibee employees.
Wala labot diri, ginmandu man sang DOLE nga ibalik sang lima ka mga contractors sang JFC ang iligal nga pagbuhin sa sweldo, bond, donasyon, share kag iban pa ka koleksyon sa 412 ka mga apektado nga workers nga nagabalor naman sang PhP 14 million.
Suno sa ahensya, padayon ang ila nga inspeksyon sa mga dalagkuan kag sikat nga mga fast food chains sa pungsod sandig man sa kampanya sang gobyerno batuk sa kontratuwalisasyon.
Wala pa naman sang opisyal nga reaksyon ukon pahayag ang JFC sa mandu sang DOLE. -RCSG
