Davao City – Nasunog kadlawon sa Domingo, Marso 10, ang usa ka junk shop sa may Brgy. Baliok Talomo District ning siyudad bandang ala-1:00 pasado ang takna.
Nagsumikad matud pa ang sunog gikan sa mga scrap plastic nga anaa sa sulod sa maong establisemento nga gipaarkelahan’g gambalay ni Joy Abelllana Parrenio nga nahurot kini og ka sunog ug na fire out alas-2:00 na ang takna sa kaadlawon sa maong adlaw.
Ang kabomberohan partikular ang Talomo Fire Station padayun sa pag-imbestiga kabahin sa maong insidente kun pila ang kinatibuk-ang damyos niini.
Sa pikas bahin, nagpadayon pa usab ang imbestigasyon sa Lanang Fire Station aron masuta ang rason sa pagkasunog sa junk shop nga gipanag-iyaha ni Danny Chua niadtong adlaw’ng Sabado sa buntag, Marso 9.
Apan sa inisyal nga imbestigasyon ni Senior Fire Officer 3 Cipriano Gonzales nga posible ang pag-init sa crusher machine ang nag trigger sa sunog sa shop.
Giingon ni Gonzales, midikit sa mga sako ang init sa makina ug didto na nagsugod ang pagsilaob sa kalayo alas-6:00 sa buntag.
Usa ka concerned citizen ang nagpahibalo sa usa ka empleyado nga si Dan Marquinio nga nasunog na ang shop maong dali nakapangayo og asistensiya ngadto sa Fire Station.
Apan wala na matabang sa kabomberohan ang pagpatay sa kalayo sa shop diin padayon pa usab gisayod ang kinatibuk-ang damyos hinoon walay casualty nga natala sa maong insidente.
RadyoMaN Paul Canono, RadyoMaN Joel Viray
