TACLOBAN CITY – Igbabalhin na han Department of Social Welfare and Development (DSWD) an mga benepisyaryo han Pantawid Pamilyang Pilipino Program (4P’s) ha Leyte tikang ha Philippine Veterans Bank ngadto ha Landbank of the Philippines.
Ha interview han RMN kan DSWD Regional Director Yvonne Serrano-Abonales, makarawat na hin bag-o nga cash cards an mga benepisyaryo tinikangan yana nga semana.
“Maghahatag pala kami hin cash cards either yana nga week or next week. It will be assisted by Land Bank and DSWD.”
Sobra 60,000 nga mga benepisyaryo han pantawid an igbabalhin na ha Land Bank.
Dugang nga pamahayag ni Director Abonales, pagkarawat han mga pantawid han ira cash cards in mayada na sulod nga kwarta nga pay-out han kanan P5 ngan P6.
An nagin rason man gud daw han pagbalhin in mahitungod nga makuri magtransfer hin kwarta ngadto ha Philippine Veterans Bank.
“An akon nakarawat nga information is makuri magtransfer hin funds from Land Bank to Veterans Bank.”
Apil na dinhi ha pagbalhin hin bangko an mga benepisaryo han Modified Conditional Cash Transfer (MCCT) ngan Regular Conditional Cash Transfer (RCCT).
Mag-aabiso an Municipal Link ngan City Link ha iyo mga lugar kun pwede na makuha an nasabi nga mga bag-o nga cash cards.
