Davao City – Sa sinugdanan pa lamang, hugot nang gisupak ang K-12 education program nga mapatuman kini sa nasud gumikan kay magpalisod lamang kini sa mga ginikanan tungod sa dugang gastohanan sa ilang mga estudyante.
Gani, nasuta sa Alliance of Concerned Teachers (ACT) Davao City Chapter nga adunay pribadong mga tulunghaan sa sekondariya nga sekretrong gapabayad og dugang sa ilang mga Junior ug Senior High students.
Sukwahi sa pampublikong tulonghaan, gi-abaga sa gobyerno ang gasto sa K-12 busa pamasahe ug baon na lang ang hunahunaon sa mga ginikanan, matud ni ACT Focal Person Reynaldo Pardillo.
Gisaway ni Pardillo ang kakuLang sa materyales sa programa maong bisan silang mga magtutudlo naglibog tungod kay gubot pa sa lukot ang curriculum nga gi-implimentar sa Department of Education (DepEd).
Gibulgar pa ni Pardillo ang kalisdanan nga nasinati sa mga Senior High students kay walay giandam nga lugar kun kumpanya ang gobyerno aron mag-OJT unta sila sa vocational courses nga ilang gikuha ug na-gradweytan.
Gibatikos ni Pardillo ang DepEd nga kanhi gipamunoan ni Bro. Armin Luistro ubos sa rehimeng Aquino tungod kay wala konsultaha ang mga magtutudlo ug mga major stakeholders mahitungod sa K-12 program.
Gumikan sa implementasyon sa K-12 education system, mas nabug-atan og maayo ang mga pampublikong magtutudlo kay nadugangan ang ilang trabaho nga angay humanon sa tukmang panahon.
Busa, siguradong malipay gayod ang mga public educators sa Pilipinas sa gitinguha ni House Speaker Alan Peter Cayetano nga gipailawom sa comprehensive oversight review ang K-12 education system sa Aquino administration.
Kini nagpasabot lamang nga ang Pilipinas dili pa hingpit andam mo-adaptar sa 12-year basic educational system nga gisunod sa daghang kanasuran sa kalibutan nunot sa kadaghang problema nga wala pa masulbad sa gobyerno hangtud karon, dugang ni Pardillo.
RadyoMaN Joel Viray
