Davao City – Daghan sumala pa ang maapektuhan ugaling tanggalon ang K to 12 Basic Education Program.
Sa pakighinabi sa DXDC RMN Davao kang Abbejem Graffani, magtutudlo sa Compostela, Compostela Valley Province, gisaysay niini nga walay rason nga tanggalon ang K-12 kay kini nasugdan na. Gawas niini, daghan na usab sumala pa’g natukod ang gobyerno nga senior high school buildings ug mga gi-hire nga magtutudlo.
“Daghan na ang senior high buildings nga natukod. Unsaon nalng ang mga teachers sa senior high nga na hire, asa sila ipamutang? Daghan na ra ba kaayo sila,” saysay ni Graffani.
Samtang kabahin sa pagtulun-an sa mga bata, nindot sumala pa ang mahatag nga foundation pinaagi sa pag develop sa kahibalo aron mas andam ang nahisgutan padulong sa kolehiyo.
“Kung about sa learnings sa bata…okay kaau kay makahatag ug foundation, ma develop ilang knowledge and skills ready para college,” saysay ni Graffani.
Bisan pa man, gibutyag sa magtutudlo nga lisod pa nga makapangempleyo o makapangita og trabaho ang mu-gradwar sa senior high school diin kulang pa sa experience ug dili pa college graduate nga maoy sagad usa sa rekisitos karon sa mga kumpanya nga nangita’g trabahante.
Kahinumduman nga gipaklaro sa Commission on Higher Education (CHED) nga buot lamang nilang i-review ang transition program sa K to 12 sukwahi sa mikatag nga balita nga kini tanggalon.
RadyoMaN Kirby Manzon
