Kaakig, ginalantaw rasun sa pagluthang sa mga biktima sa brgy. Dalicanan, Passi City nga nagresulta sa kamatayun sang isa pa kag pagkapilas sang duha ka tawo kaina sang kaagahun

457

Ang mga biktima ang ginkilala nga sanday Joebert Mandate, 37 anyos may igo sa ilok sang Brgy. Tagubong, kag Lodovico Claridad, 35 anyos nga may kibyas nga igo sa tuo nga abaga samtang patay naman si Afrantes Alarilla 36 anyus nga may igo sa ulo lunsay residenti sang brgy. Dalicanan, Passi City.

Sa interview sang RMN Iloilo sa isa sa mga biktima nga si Lodovico Claridad dalican, walo sila nga sakay sa trisikol kag papuli na halin sa baylehan sa Brgy. Dalicanan sa paglataw sang isa ka aktibidad kadungan sang bespiras sang fiesta sa nasambit nga barangay.

Una nga nagasunod sa ila ang isa ka motorsiklo nga may sakay nga tatlo ka tawo kag naga-ikis ang dalagan tubtob nagdulog sa unhan, pagtuparay sang ila salakyan ginhambalan sang isa sa mga upod nila nga hubog ang mga sakay sini.

Mation-tion nakit-an nila nga nagasunod na ang motorsiklo kag hinali lang ang mga ini ginluthang sang isa sa mga sakay.

Suno sa kay Police Supt. Antonio Fullero ang hepe sang Passi City Police Station possible nga naakig ang sakay sang motorsiklo sang ginhambalan sang upod sang mga biktima nga hubog ang mga ini.

Dugang pa ni Fullero nga wala man sang nagluntad nga pagbina-isay sa tunga sang magtimbang nga bahin bag-o natabo ang insedinti.

At-large pa tubtob subong ang wala pa makilala nga suspek nga nagluthang sa mga biktima samtang gintransfer na sanday Mandate kag Claridad sa Western Visayas Medical Center nga yara na sa luwas nga sitwasyun.

Facebook Comments