Davao City – Nagbangutan ang kabanay sa gipusil patay nga negosyante’g lubi sa Barangay Riverside Calinan District ning dakbayan sa Davao.
Naabtan sa punerarya ug eksklusibong nahinabi sa DXDC ang kabanay sa biktima nga mga ulahing nakauban niini sa sakyanan una kini makutlui sa iyahang kinabuhi pasado alas-3 sa hapon niadtong adlawng Dominggo.
Dili gihapon makadawat ug tulala pa sa mga panghitabo ang asawang si Junna Amor Ferrrin human masaksihan ang pagpamusil sa iyahang banang si Ruben Ferraren.
Sumala sa ugangan sa biktima nga si Leonila Liwanag, kinsa naglingkod sa likod sa sakyanan, ni menor si Ruben tungod adunay nibabag nga kotse kanila ug kalit lang nisulpot ang gun man ug gipusil sa makadaghang higayon ang biktima.
Daling nisibat sakay sa motorsiklo kauban ang lain pang suspetsado ang mamumuno.
Gisulti sa igsuon sa biktima nga si Brgy. Riverside Calinan Kagawad Johny Dumanayas pipila ka adlaw una mahitabo ang insidente adunay mga gabahis-bahis nga mga suspisyusong indibidwal sa gawas sa ilahang panimalay.
Hustisya ang singgit sa mga pamilya sa gipatay nga negosyante.
Sumala ni Police Major Jake Golez, Calinan PNP Station Commander, personal grudge ang gilantaw nga motibo sa pagpatay kang Ferrarin.
Padayong giimbestigahan sa kapulisan ang uban pang mga anggulo ug ang nilusad sila’g hot pursuit operation sa mga suspek.
RadyoMaN Aimee Guinita
