Davao City – Pagpanimalos ang gituhoan sa mga kabanay ngano gidungan og pusil patay ang magtiayon sulod sa ilang balay sa may Purok 25, Malagamot, Panacan ning siyudad.
Matod pa nila, makita kini sa brutal nga pag patay kang Jose ug Sylvia Apor alas 6:30 sa kagabhion gahapong adlawa.
Gisugilon sa mga kabanay nga adunay nakalaban si Jose sa iyang kanhi kauban sa trabaho sa paktorya sa plastic ug gani pareho nagpatala sa presinto 4 ang biktima ug ang nakalaban niini human gihulga si Jose niadto.
24 na ka tuig nagtrabaho sa tig gamaan og plastic sa may Damosa ning siyudad si Jose ug buwan sa Oktubre miaging tuig mipahawa sa trabaho ang biktima uban sa iyang asawa nga si Sylvia.
Kumbinsido ang mga kabanay nga kaila ra sa mga biktima ang mipatay kanila kay lakip na ang ilang apo ug pag-umangkon nga si Michelle Martinez buot sab patyon sa mga suspek.
Apan maayo na lang kay abtik sila nakagawas sa balay ug nakatago sa kasagbutan sa mao nga dapit.
Aduna na’y mga pictures sa cellphone ang anak sa mga biktima sa mga suspek nga mipatay kanila apan nagdumili una kini isapubliko ang panagway ug mga pangalan sa mga mamumuno.
Migula sa inbestigasyon nga ang mga suspek gihulagway og tama-tama lang ang lawas, 5’5 ang gitas-on, 20 ug 30 ang pangidaron, nakasuot og jacket ug kalo nga itom, ug nakamotor og XRM nga walay plaka.
Nasayran nga gisulod sa mga criminal ang mga biktima sulod sa ilang balay ug walay kaluoy nga gipusil og makapila ka higayon ang mag-asawa ug dihang nasiguro na nga patay na ang duha daling misibat ang mga suspek sakay sa ilang motor.
RadyoMaN Joel Viray
