Davao City – Sanglit dunay dakong papel ang mga kabatan-onan sa mamahimong kaugmaon sa nasud busa karon pa lang mahulma na daan ang ilang liderato aron maandam sila daan sa paggunit og gahom sa gobyerno hulip unya sa edaran nga mga opisyales karon.
Busa mahinungdanon kaayo nga makasalmot sa Sangguniang Kabataan (SK) Election ang mga batan-on kay dinha mabansay ug mahasa sila sa katungdanan apan sa matarong ug dili dunot nga pag-umol, suma ni DSWD Assistant Secretary Luz Ilagan.
Matud ni Ilagan, dili lang hangtud pagbansay ug paghasa sa kahibalo umolon ang mga batan-on apan tudluan usab sila sa maayo nga pamulitika sa katuyuan nga dili nila masunod ang trapo nga mga politiko diin ang kasinatian nmasambugan og kurapsyon ug pangabuso sa gahom diin ang nahimong makaluluoy mao ang katawhan nga ilang gisilbihan.
Dugang pasabot ni Ilagan nga dili lang ang SK ang training ground sa kabatan-onan apan dunay sa’y laing aspesto sa pagbansay puwede sudlan sa mga batan-on nga interesado magserbisyo sa kagamhanan ug sa katawhan.
Gipamugos pa niini nga karon ang panahon aron bansayon na sa pulitika ug sa pangalagad sa katawhan ang mga batan-on pinaagi sa pagtukmod kanila sa pagsalmot sa SK Election.
RadyoMaN Joel Viray
