Kadagkuan nan Surigao City Disaster Risk Reduction Management Council otro na nagtigom sa pagtuki sa sunod na lakang sa nodahili na lupa sa Purok Pag-asa, Capitol, Brgy. Washington
Otro na nagtigom kaganina an mga naglangkob sa Surigao City Disaster Risk Reduction Management Council sa pagpanguna ni Mayor Ernesto Matugas kaiban sila ni Vice Mayor Alfonso Casurra, mga barangay officials sa Brgy. Washington, kadagkuan sa Mines and Geosciences Bureau, mga dept. heads ug iban pa. Sentro sa pagtuki an sitwasyon sa Purok Pag-asa, Capitol sa lupa na midahili.
Tagbasa isab didto an nahimong resulta sa assessment nan MGB pinaagi nan Supervising Geologist Elaine Galido ug kaibanan sa mga lugar na tagkonsiderar na jaon sa critical area o danger zone, high risk ug moderately high. Nauyunan na laing pagbisita an himoon silom adlawa nan kadagkuan sa MGB kaiban an taga-City Social Welfare and Dev’t. Office ug City Planning para sa pagkuha nan Structural Plan adisir pa mohimo nan kongretong aksiyon sa naghuya sa 10 meter buffer zone kon ipatuman ba an force evacuation.
Namahayag si Mayor Ernesto Matugas, an problema na masugatan kon ipatuman an pugsanong pagpabalhin sa mga residente an logistics pareho sa kabalhinan na Resettlement Site sa Brgy. Silop kay kasagaran sa mga ini an dili ganahan ug lajuan sa lugar. Isa sa laing option nila an Brgy. Sabang kay basin jaoy ila hikit-an na lugar na posible didto ipabalhin, hinoon tagtakda pa isab nija na pakigkitaan an kadagkuan sa Bureau of Fisheries kay ila ini hurisdiksiyon. Ija isab tagpaabot ngadto kan Brgy. Kapitan Christopher Bonite nan Brgy. Washington na temporaryo na ibutang anay siguro an mga mamakwit sa Brgy. Multipurpose Gym kon sugdan na an force evacuation. An mga lakang himoon sa gobyerno sa siyudad para luwas an kinabuhi nan mga residente labi na an jaon sa high risk area.
