Davao City- Nagrekomendar ang Davao City Fire District ngadto sa lokal nga kagamhanan nga padak-an ang mga dalan sa mga fire-prone areas.
Ang kapiot sa mga dalan nga dili dayon masudlan sa mga fire trucks maoy gitudlo nga usa sa mga hinungdan nga malangan ang kabomberohan sa pagresponde sa mga sunog nga mahitabo dinhi sa dakbayan sa Davao.
Busa girekomendar karon sa Davao City Fire District ngadto sa lokal nga kagamhanan nga mapadak-an ang mga agianan panahon sa mga emerhensiya.
Sumala ni Davao City Fire District Fire Arson Investigator Ramil Gillado, ang Boulevard area ug Agdao padulong Sasa lisod dayon maaksyunan panahon sa sunog.
Karong bulan lamang sa Agosto duna nay 12 ka sunog ang nahitabo diin duha na ang natalang patay, tulo samdan ug mubalor ngadto sa 3M ang kantidad sa sunog dinhi sa dakbayan.
Sumala sa opisyal daghan ang nahitabong sunog sa mga residential areas ug electrical short circuit gihapon ang nag-unang hinungdan sa mga nahitabong sunog.
Kasamang Aimee Guinita
