Davao City – Padayon karon ang pag-ampo sa pamilya ni Carlo Paalam, 23-anyos alang sa kadaugan niini diin kini ‘fighting for gold’ na karong adlawa (Agosto 7, 2021) sa Boxing Men’s Flyweight sa 2020 Tokyo Olympics.
Sa interbyu sa DXDC RMN Davao kang Pio Reo Paalam, 52-anyos, amahan ni Carlo, gisaysay niini nga 9-anyos pa lamang si Carlo sa dihang nagsugod kini sa iyang career sa boxing diin sa kasamtangan anaa na sa walo ka medalya ang nauli ni Carlo sa international competition wala pay labot sa iyang nakuha sa lokal, samtang ang Tokyo Olympics ang usa sa pinakadakong kompetisyon usab nga iyang giapilan.
“Ang akoa nga mga pag-ampo lang gyud ang atong mahatag sa iyaha, nga panalanginan siya nga ihatag intawon sa Ginoo (ang kadaugan) karong Sabado. Akong paniid sa iyaha nga diskarte-ay ra gyud ‘ni, teknikay ba kung unsaon niya nga magmadaugon ‘ta, ang Pilipinas,” saysay sa amahan.
Dugang sa amahan ni Carlo nga suportado usab sa ilang lokal nga gobyerno sa Cagayan de Oro (CDO) City ang boxing career sa anak, sa iyang pag-apil sa mga kompetisyon.
Ala-1 unyang hapon himuon ang Men’s Flyweight Finals diin makalaban ni Carlo Paalam si Galal Yafai sa Great Britain diin nag-ampo ang pamilya ni Paalam nga mauli niini ang ikaduhang Olympic ‘gold medal’ sa Pilipinas.
RadyoMaN Kirby Manzon
