El maga pulis del Ayala Police Station formalmente ya planta ya caso na fiscalia con el un kagawad conquien ya cuji durante el buy-bust operation na Pamucutan.
Asegun con el jefe del Ayala Police Station si Sr. Insp. Albert Alfaro, ya entrega ya sila na fiscalia el maga caso de illegal possession de armas de fuego y droga contra con Florentino Ebol, 55, un kagawad del mencionao barrio.
Pero si Ebol ya pirma el 15-dia waiver donde ya detene otravez conele na estacion del Ayala mientras continuando el que se llama preliminary invetsigation na fiscalia.
Acordando, con Ebol ya aresta el maga pulis banda alas 9:30 del noche del Deciembre 29 durante el buy-bust operation donde el maga pulis ya recobri na su posession el 3 paquete de shabu y un .38 revolver.
El maga pulis ya tene que conduci del mas temprano el surveillance aserca el mal trabajo di Ebol y ya segui dayun el buy-bust operation.
