Ya aresta el mga operativas del Tetuan Police Station anoche con el uno del mga Kagawad del Barangay Mampang desfues conele implica na asunto de droga durante el buy-bust operation que ya conduci ayer el mga myembros del policia.
Asegun con el hefe del Tetuan Police Station Supt. Nonito Asdai na entrevista del RMN Zamboanga, que con Kagawad Pilar Dagalea y Binarao ya aresta na su mismo residencia na Purok 4, Mampang, desfues implica conele na asunto porcausa cay na su mismo casa ya fuede aresta con el target del otoridad, el su mismo anak, que ya identifica si Asdai como si Dexter Dagalea. Fuera de ese, chene tambien asegun ta conduci pot session na lugar durante el diila operasyon anoche que ya resulta tambien na aresto con Joebert Eijansantos y Hortillano.
Ya fuede confisca na diila posesyon el nueve pakete de shabu y seisenta pakete nuay mas laman.
Con Kagawad Dagalea, junto con su anak si Dexter y si Joebert hay man inquest este dia na korte por el formal plantada de caso contra canila.
Asegun con Asdai, si Dagalea uno del mga conosido dru pusher na Mampang que ya dura ya sila ta man surveillance y el su transacsyon de droga ta conduci mismo na diila casa donde ta queda junto el su nana Kagawad. – *Bhong Simbajon/RMN News*
