Davao City – Gireklamo sa pipila ka mga residente sa Barangay Cabantian Buhangin District ning siyudad ang ilang kagawad kinsa nanghulga kanila.
Nasuko matud pa ang mao nga kagawad sa iyang mga constituent gumikan kay gimulo nila ang videoke house nga iya sa opisyal sa may Suraya Subdivision Cabantian, Buhangin District ning dakbayan.
Giingon ni Rhea Fe Castromero, 44 anyos, minyo, nga ilang gireklamo ang videoke house gumikan kay nakahasol ang kabanha niini apan gikasuko kini ni kagawad Anthony Gillo.
Namahad matud pa ang kagawad nga pamusilon silang tanan butang nakamugna og kabalaka ug alarma sa bahin sa complainant hilabi na nga giluwat kini atubangan sa iyang mga anak alas-8:00 sa kagabhion.
Lakip usab matud pa ang asawa ni kagawad Gillo nga si Gay Gillo nagpakita og dili maayo nga kinaiya pinaagi sa pagsabwag og maoy nga mga pinulungan ngadto kang Rhea Fe Castromero.
Nasayran nga niadtong Abril 8 nanghulga usab si Kagawad Gillo sa iyang silingan pinaagi sa pagsulti nga mamusil kini human gibato ang iyang balay ug napasaninglan mao ang residente sa dapit.
Lakip gimulo sa mga residente ang sabungan nga gitukod ni kagawad Gillo atubangan sa balay ni Rhea Fe kansang ang pader gihimong ihianan sa mga bisita sa opisyal sa barangay.
Ang kapulisan sa Buhangin nagsugyot ngadto sa complainant nga dad-on ang reklamo sa barangay level aron didto ihusay ang ilang bangi.
RadyoMaN Joel Viray
