Dead on Arrival si Barangay Kagawad Algara sa Valladolid District Hospital matapos nga gindala ini sang mga katapo sang rescue team sang Pontevedra pasado las 11:00 kaina sang aga.
Si Kagawad Edward Dominic Algara ang naga edad sang 45 anyos kag nagapuyo sa Purok Santan, Brgy. Antipolo banwa sang Pontevedra kag ara na sa ikatatlo nga termino bilang Barangay Kagawad.
Base sa panaysayon ni Rocky Timbang ni Kagawad Algara sa iya balaligyaan sang feeds nga mga las 11:00 sang aga samtang nagakilo sya sang ginbakal nga feeds sang ila costumer may nag-abot nga lalaki, nakamask kag naka jacket sang itom, mabukod ang lawas kag ginabulubanta nagataas sang 5’9″ nga nagkuha sang armas.Wala sang kun ano nga ginhambal gintiro gilayon si Kagawad Algara.
Suno kay Rocky makaduha ka beses gintiro si Algara nga naigo naman sa nawala nga bahin sang iya agtang kag sa nawala nga bahin sang iya tyan.
Sadtong Marso 20, 2020, las 10:20 ang takna sang aga may isa man ka lalaki nga may armas luthang nga nagtaya sa isa sa mga naga obra man sa feeds supply nga ginkilala kay Joseph Ignalague.
Ginpangita man sang amo nga lalaki si Kagawad Algara apang natabuan nga nagpangihe si kagawad sa likod sang balaligyaan gani si Ignalague ang gintayaan sang armas kag sang wala si Kagawad naglakat man ini gilayon.
Antis natabo ang pagtiro sa kagawad nakaestorya pa ini tuhoy sa amo nga insidente nga pagtaya kay Ignalague kag iya ginapatihan nga pagpanghold-up ang kabangdanan sang pagpanaya sang lalaki apang wala ini sang nakuha bangud wala si Algara.
Marso 24, 2019, las 5 sang hapon sang ginhold-ap man ang asawa ni Kagawad Algara nga si Helen apang gamay lamang nga kantidad ang nakuha sa amo nga insedenti kag wala sang nadakpan ang mga hold-aper gani nagpost si Kagawad sa iya Facebook nga kun sin-o man ang makatudlo sang mga naghold-ap sa iya asawa magahatag ini sang P50,000 pesos nga padya apang wala sang nakatudlo kag wala nasolbar ang kaso tubtob subong.
Si Kagawad Boyboy Algara ang ginakabig naman sang mga pumuluyo sang Brgy. Antipolo nga maayo kag mahapos pangayuan sang bulig nga tawo.
Siya man ang ginadalaganan sang nagasagod sang mga kasapatan labi na kun nagamalasakit kag masami nga nagasuporta sa mga aktibidades sang mga eskwelahan sa bisan ano nga pamaagi gani nagakasubo ang bug- os nga Barangay Antipolo sa iya temprano nga pagkadula.
Base naman sa inbestigasyon sang Pontevedra Municipal Police Station, nagaguwa nga robbery with homicide ang motibo sang pagpatay kag nagapadayon ang hot pursuit operation sang mga kapulisan batuk sa suspek.
[image: image.png]
