Ginatinguhaan nila sa subong suno kay Court Administrator Jose Midas Marquez nga madecongest ang South Cotabato Provincial Jail paagi sa madasig nga hearing kag pagdispose sang kaso sang mga inmates amo nga nagpadulong dire sa probinsya kahapon nga adlaw ang Enchanced Justice on Wheels .
Nahibaluan nga nagalab-ot na sa malapit 1,600 ang numero sang mga inmates sa Provincial Jail matapos nga ang kapasidad lamang sini ang yara sa 500 ka mga bilanggo.
May-angot sini lakip sa ila nga aktibidad kahapon nga adlaw suno kay Atty. Marquez ang pagbisita sa Provincial Jail para sikyaron kon bala may-yara sang mga menor de edad kag mga tigulang na nga bilanggo agud maaksyunan nga mapadasig ang pagresolber sang ila nga kaso paagi sa pag-istorya sa mga judge nga nagakapot sang ila nga kaso.
Gin-orient man kahapon nga adlaw sang Philippine Judicial Academy ang mga barangay opisyal sa ila obligasyon nga sa barangay level pa lang maaddress na dapat ang gamo sa ila lugar nga indi na maglab-ot pa sa punto nga magpinasakaay sang kaso sa korte kag makadugang pa sa pagginutok sang detention facility sa South Cotabato.
Lakip man sa aktibidad nga ginhimo nila suno kay Atty. Marquez ang pagpakigdayalogo sa mga judges, prosecutors,PAO Lawyers, Bjmp, Pnp Officials dire sa probinsya agud nga kon may problema maaksyunan gilayon kag team building naman sa mga court personnel.
Ginpahayag man ni Marquez nga posible makabalik pa dire sa probinsya ang Justice on Wheels sang Korte Suprema tungod ginamonitor man nila ang dalagan sang mga kaso sa pungsod.
Samtang ginkumpirmar man ni Atty. Marquez nga sang sa bahin sila sang Saranggani Province sang tinalikdan nga adlaw masobra 20 ka mga inmates ang nahilway gilayon paagi sa Justice on Wheels sa masobra 70 ka mga criminal cases nga nahearing nila.
