Tinanggihan ni Bureau of Corrections (BuCor) Director General Gregorio Pio Catapang Jr. ang kahilingan ni dating Bamban Mayor Alice Guo at ng 2 iba pa na manatili pa ng 55 na araw sa quarantine area ng Correctional Institution for Women sa Mandaluyong City.
Ngayong araw na ito kasi nagtapos ang quarantine period para kina Guo, Jaimielyn Cruz at Rachelle Joan Carreon.
Bunga nito, inatasan na ni Catapang si CT/Supt. Marjorie Ann Sanidad, Superintendent ng CIW na ilipat agad sina Guo, Cruz at Carreon sa regular dormitory sa Reception Diagnostic Center.
Ito ay para sumailalim sa mandatory orientation, diagnostic at classification base sa procedures at protocols.
Pagkatapos naman ng 60-day process sa RDC, sila ay ililipat sa regular dormitory sa Maximum Security Camp dahil habambuhay na pagkabilanggo ang hatol sa kanila.
