Davao City- Dakong factor sa depresyon ug pagkabuang sa usa ka tawo ang paghuyang sa pamilya lakip na ang mga naabuso dali ra magkutlo sa kinabuhi hilabi na kung dili na makaya ang gidala nga problema.
Si Koinonia Theological Seminary Masters in Counseling Program Coordinator Dr. Ermela Deposa nagsulti nga ang mga tawo nga walay lig-on nga pamilya dili makamao modala sa suliran busa dali ra kanila ma-depressed ug mabuang diin ang tendency magpakamatay.
Migawas sa pagtuon ni Gina Agtas, mikuha og Master’s Degree Counseling sa KTS nga ang social media dunay dakong impluwensiya sa depresyon dili lamang sa mga kabataan apan bisan pa sa mga hamtong.
Sigun ni Agtas, ang pagpadayag sa kasuko ug negatibo nga lantaw sa kinabuhi diha sa social media mga timaan sa depresyon diin labing apektado ang pangutok.
Ug kini nga matang sa estado magresulta sa hinanaling pagkutlo sa kinabuhi sanglit pulos naman negatibo ang anaa sa hunahuna kansang ang paglaum daw dili na mudan-ag kaniya.
Rekomendasyon ni Dr. Deposa alang sa tanan mao nga ibalik ang kultura kaniadto nga integrated family ug ang pagsuod sa mga miyembro sa banay aron dili mag-inusara sa problema inay magtimbayayong sa pagsulbad sa mga suliran.
Gikanayon ni Agtas nga dili mopaigo ang mga programa sa gobyerno alang sa mga naliso-an sa pangisip ug kung aduna lang unta’y mga buhatan sa gobyerno nga gahatag og libre nga tabang matambalan na unta ang mga buang ug wala na unta sila maglakaw-lakaw sa kadalanan.
RadyoMan Joel Viray
