Davao City – Naguol ang mga apektadong residente human nga gisugdan na kagahapon sa buntag ang pag-demolish sa kabalayan nga nagpuyo diha sa ilalom sa tulay partikularminte diha sa may Brgy. 40-D ning syudad.
Kini subay sa mando ni Davao City Mayor Inday Sara Duterte Carpio nga i-demolish ang kabalayan nga nahimutang duol sa sapa kun danger zones human nga daghang mga dabawenyo ang naapektuhan sa grabeng baha kaniadtong Disyembre sa miaging tuig.
Kasigurohan sa pamuyo ug sa kinabuhi sumala pa ang gilantaw sa lokal nga gobyerno dinhi sa syudad sa Davao diin kini ang nag-unang hinungdan nganong gi-demolish.
Apan matud sa mga residente sa lugar nga duna na may panagstorya tali sa mga apektadong residente ug City Government of Davao nga andam man sila nga mohawa hangtod nga duna sab daw luna nga itagana ngadto kanila.
Dugang sa mga residente, wala kuno matuman ang polisiya nga walay demolisyon hangtud walay relokasyun kundiin maoy usa sa mga gipangyawyaw sa mga tao nga anaa sa lugar.
Naglisod usab sila kung asa dad-on ang ilang mga gamit gani naguol usab sila ilabi na nga balik eskwela ang ilang kabataan gikan sa bakasyun sa pasko.
Sa karon, ang mga apektadong residente, anaa sa ilang nagkadaiyang paryente samtang ang uban anaa nahimutang sa covered court gym sa Brgy. 40-D.
RadyoMaN Paul Canono
