Indi sa gihapon mapangitaan sang konkreto nga solusyon sang Department of Agriculture (DA) kag National Food Authority (NFA) ang problema sa kakulang sang supply sang bugas sa pungsod.
Sa hearing sang Committee on Food and Agriculture, ginpahayag ni NFA Administrator Jason Aquino nga pag-abot sang Abril kag mayo mabatyagan ang rice shortage sang NFA.
Suno kay Aquino nga daku ang problema bangud ang 250 mil ka metriko tonelada nga rice imports nga pang-replenish sa rice shortage ang ginalauman nga magaabot pa sa bulan sang Hunyo.
Samtang sa bahin naman ni Agriculture Secretary Manny Piñol, wala sang dapat ikahadluk ang publiko bangud bastante ang supply sang bugas sa pungsod.
Ginpaathag ni Piñol nga yara sa 96% ang self sufficiency sang pungsod sa bugas kag ginalauman nga magataas pa ini bangud mas ganado nga magtanum subong ang mga mangunguma.
