Tungod sa kakulangon sa suplay sa mga substance o chemicals nga gamiton sa pagbuhat og sanitizer alang sa mga frontliners sa Marawi City ug Lanao del Sur, maglisod ang mga chemist sa pagbuhat niini.
Matud pa ni Jeff Adiong, usa sa mga provincial board member sa Lanao del Sur isip federated president sa Sangguniang Kabataan, nakakita sila og supplier sa maong mga chemicals apan limitado lang ang supply niini.
Nagpasabot, nga imbes target sa probinsiyal nga kagamhanan nga makabuhat ang mga chemist sa Mindanao State University-Marawi og 200 ngadto na sa 240 litros, posible’ng dili kini mahimo dayun.
Ang maong gidaghanon sa sanitizer maoy ipanghatag ngadto sa 39 ka mga lungsod nga tag lima ka litros ngadto kanila lakip na ang siyudad sa Marawi ug ang Amai Pakpak Medical Center.
Kung kahinumduman nga gi-link ngadto sa buhatan sa SK Federation sa Lanao del Sur ang upat ka mga registered chemist sa MSU-Marawi dihang nanawagan ang maong buhatan og makatabang og buhat og sanitizer isip solbad sa kakulangon niini sa probinsiya.
Usa ang Lanao del Sur sa mga dapit sa Mindanao nga gikonsiderang high-risk tungod kay residente sa probinsiya ang unang namatay nga COVID-19 nga pasyente sa Mindanao. (Divina M. Suson, Marawi City, March 27)
