Davao City – Gibutyag sa usa ka bugaw nga si alyas Ann nga kadaghanan sa mga tawo karon kuwang kaayo sa kahibalo mahitungod sa sakit nga Human Immuno Deficiency Virus (HIV-AIDS).
Segun ni Ann, kasagaran nga ignorante sa HIV-AIDS mao ang mga kalalakin-an nga mahilig makighilawas sa ‘sex workers’ nga nagkatag sa sentrong bahin sa dakbayan.
Sumala ni Ann, kadaghanan sa mga lalake nga iyang gikasabot alang sa babaye nga ubos kaniya dili mugamit og condom ug kun pugson masuko.
Buwag sa bana si Ann ug 14 na ka tuig nahimong bugaw ug dinhi na niya gibuhi ang pito niya ka anak.
Dili malilong nga adunay taas nga gibangkagaan si Ann sa HIV-AIDS lakip na ang epekto ug kadelikado niini hilabi na kun mutapot sa tawo ang balatian.
Busa kabahin sa transaction ni Ann ngadto sa iyang mga customers ang paggamit og condom aron luwas sa makamatay nga sakit ang customer ug ang sex worker.
Gitug-an ni Ann nga usa ka libo ang iyang gilagaan nga ‘sex worker’ karon apan luyo sa gidaghanon nakapasalig kini nga ni usa kanila walay sakit nga HIV-AIDS.
Matag semana nagpatan-aw sa City Health Office (CHO) ang mga sex workers kansang ang walay virus hatagan og pink card isip pruweba nga sila luwas gikan sa makamatay nga sakit.
Dugang ni Ann, libre sa tambal ug condom ang mga sex workers gikan sa CHO ug kun ugali dunay mag-positibo sa HIV-AIDS gilayon kini i-quarantine aron sa maseguro nga dili mukatag sa uban.
Sa tan-aw ni alyas Ann, wala midulot sa pangisip sa mga tawo kun unsa ang luwas nga pakighilawas kun mugamit og daghang partners diin kini tanan dayag sa sobra na ka immoral sa mga tawo karon.
Busa tambag sa mga eksperto sama ni alyas Gardo kinsa kauban ni Ann ngadto sa hangol og unod mao nga mugamit gyod og condom una mukabayo aron dili matakbuyan og HIV-AIDS.
RadyoMaN Joel Viray
