Davao City – Ang bulan sa Disyembre ang pinaka-gikahinam-hinaman sa tanan matag tuig gumikan kay gawas sa Thirteenth Month Pay ug Christmas bonus, dinhi ginapahigayon ang mga gatherings, Christmas parties, taas nga break sa eskwela ug trabaho gani dinhi usab mahitabo ang ‘reunions’ sa matag-pamilya ilabi na niadtong nagtrabaho halayo sa ilang mga kalungsuran o bin ba kaha atua karon sa overseas kun abroad.
Apan dinhi sa syudad sa Dabaw, tulo ka adlaw una ang Pasko, nahitabo ang duha ka sunod-sunod nga kalamidad diin imbes nga magsadya kitang mga Dabawenyo kay hapit na ang kapaskohan, napuno na man hinoon kita’g kaguol, kasakit ug kasubo alang sa mga igsoon natong naapektohan sa managkaluhang katalagman.
Kada tuig, adunay average nga 18-20 ka mga tropical storms kun bagyo ang sagad mobisita sa Pilipinas gani niadtong Disyembre 22, nikunsad dinhi si bagyong ‘Vinta’ diin dakung apektado ang Mindanao ilabi na ang syudad sa Davao.
Walay nadala nga gamit, lapok nga panimalay ug ang mas grabe, walay nabilin maski ang ilang balay ang mga naapektuhan sa dakong baha mugna sa kalit nga pagsaka sa lebel sa tubig sa Davao River.
Nahinabi sa DXDC Team si Joselito Morales, nanimuyo kilid sa sapa sa Mandug, diin wala na siya’y nadawdaw bisan usa sa mga appliances gani, ang suot lang niya kaniadtong taknaa.
Tungod sa kadaku sa epekto sa maong bagyo dinhi sa syudad, gipailawon sa ‘state of calamity’ ang 25 ka mga barangay denhe diin apil nga naapektuhan ang agrikultura ug mga government structures.
Gani, na-realisa si Joselito nga ang gumikan sa ra usab sa katawhan nga walay pakabana sa pagpamutol og kahoy resulta sa daling pagbaha sa lebel sa tubig sa Davao River.
Subay niini, nangita’g paagi ang lokal nga panggamhanan alang sa pagtunol ug hinanaling ayuda sa mga nanginahanglan.
Samtang naningkamot mobarug ang mga nabahaan, kalit niulbo ang dakung sunog sa NCCC Mall of Davao sa misunod nga adlaw, Disyembre 23, 2017.
Nagsugod ang dakung kalayo alas-9:35 sa kabuntagon diin adunay mga call center agents ang na-trap ug gideklarang fire-out sa Bureau of Fire alas-5:15 sa Domingo, Disyembre 24, usa ka adlaw una pa man mag Pasko diin 38 ka mga kinabuhi ang napagan sa nagdilaab nga kalayo.
Sa tuig 2017, niabot sa P2.2B ang damyos sa sunog sa tibuok Dabaw lakip na sa mga residential areas ug dagkong imprastraktura.
Kining mga kalamidad sa tuig 2017, sama sa bagyo ug sunog, makonsidera nga ‘wake-up call’ kun ‘eye-opener’ dili lamang ngadto sa mga biktima apan sa tibuok nanimuyo sa dakbayan nga dili gayud ibale-nada ang mga pahimangno sa lokal nga panggamhanan kun adunay mga warnings sama sa ‘pre-emptive evacuation’ ug tinood nga mopartisipar sa mga ipahigayong fire drills alang ra usab sa mas luwas nga komunidad diin ang atong nakat-onan magamit ra gihapon nato sa 2018 ug sa mga katuigan nga taliabot.
RadyoMaN Jason Amisola & Abi Bibera
