Davao City – Gipaabot sa mga residente sa Biao Joaquin Calinan ning syudad ngadto sa sibyahanan sa DXDC 621 RMN Davao ang ilang mulo bahin sa kalidad sa tubig sa Davao City Water District kun DCWD.
Pinaagi sa programa ni RadyoMaN Misel Miral-Galve nga Serbisyong Straight to the Point, giadtuan ni RadyoMaN Erin Lumosbog ang Bria Homes sa Calinan diin nakasinati ang mga residente og itom nga dunay balas nga agas sa tubig sulod na sa upat ka adlaw.
Busa hangyo sa mga residente nga sutaon kini sa DCWD gumikan nagapalit nalang sila og mineral water alang sa ilang pang adlaw-adlaw nga konsumo.
“Dili gyud mainom ang tubig nga mugawas sa gripo kay lagom kaayo ug naay sagol nga balas, so namalit nalang mig mineral water arun naa mi mainom,” sumala sa usa ka concerned citizen.
Subay niini, nahinabi sa DXDC ang deputy spokesperson sa DCWD nga si Johanna Duhaylungsod diin iyang gipasabot nga adunay gihimong tapping ug looping sa linya sa tubig sa nasangpit nga lugar niadtong miaging semana.
Dugang niya nga maapektuhan gyud ang kalidad sa tubig panahon nga dunay ipahigayon nga pag improbar sa supply sa tubig aron usab mapalapdan pa ang serbisyo ngadto sa mga konsumante.
Busa tambag sa tigpamaba ngadto sa mga apektado nga ipadala ang account number o area ngadto sa DCWD aron makahimo og flushing sa linya sa ilang ug ma-verify ang kalidad sa tubig pinaagi sa water testing ingon man makumpirma kung limpyo na ang tubig.
Jiah Cadiz, HCDC MassCom Intern
