Na boto de 213-10 ya vota el Kamara na aca-tres y final reading ayer con el pasada del House Bill 6308 que ta man postpone con el conducta del Barangay y Sangguniang Kabataan elections para na Segundo lunes del mez de Mayo año 2018.
Asegun con el uno del mga quien ya propone con el mentionao bill, el Congresista Celso Lobregat na entrevista del RMN Zamboanga, que el overwhelming majority ya vota para suporta con el postponement del eleccion na barangay y SK amediante el apelo del Presidente Rodrigo Duterte.
El House Bill 6308 ta propone para dale pa mas poder pormedio del hold-over capacity con el mga presente oficiales del barangay y para fuede Tambien dale largo tiempo con el mga otoridad man monitor, planta caso y aresta con aquellos semejante mga official que imbuelto na actividades de droga illegal na diila maga cada cualan jurisdiccion.
Bajo na provicion del mensyonao bill que ta fuede lang quita con tal official de barangay si chene el se llama “probable cause” y acto de crimen.
El govierno nacional chene el fondo de P901,150,000 para el conducta del SK elections y P155,167,000 para el SK registration bajo na Republic Act No. 10651.
Chene tambien P5,914,992,000 por el conducta del SK y barangay elections y cantidad de P422,734,000 para el SK y barangay registration bajo na Republic Act No. 10717.
Asegun con Lobregat, el postponement del barangay y SK elections como suporta con el intensificao campana del Presidente Duterte contra droga na paiz. – *Bhong Simbajon/RMN News*
