Kamatayon sa engineer nga gipusil, padayong gisulbad sa kapulisan

Davao City –Paningkamutan sa Davao City Police Office (DCPO) nga masulbad ang mga krimen sa dakbayan nga maoy ilang gipanaad sa katawhan sama nalang sa kamatayon sa usa ka engineer sa Tugbok District human gipusil-patay niadtong April 19, 2024.

Sa interview sa DXDC RMN Davao kang Police Captain Hazel Tuazon, ang spokesperson sa DCPO, iyang gibutyag nga sensitibo kini nga kaso ug dili pa makapagula og progress report ang Tugbok PNP aron dili madaot ang imbestigasyon.

“Sensitive case siya, dili kaayo mi muhatag og info about ani kay aron dili ma-hamper ang investigaton. Pero naningkamot ang atong kapulisan nga ma-file gyud ang kaso sa korte. Kay mao man gyud na ang goal sa DCPO nga kung nay mahitabong ing-ani, maningkamot ta nga mapasaka ang kaso sa korte,” saysay ni Tuazon.

Kahinumduman nga dead on arrival si Engr. Rey Lumacat nga igo lang nag-parking sa iyang kotse human gipusil sa wala mailhing riding in tandem atubangan mismo sa ilang panimalay sa Deca Homes Subd., Tugbok District, Davao City.

RadyoMaN Ivy Parido